Azərbaycan Respublikasının Prezidenti İlham Əliyevin 6 yanvar 2026-cı il tarixində yerli televiziya kanallarına verdiyi müsahibə ölkənin daxili və xarici siyasətinin əsas prioritetlərini, regional proseslərə baxışını və gələcək inkişaf istiqamətlərini əhatə edən mühüm siyasi sənəd xarakteri daşıyır.

Müsahibədə Prezident xüsusilə vurğuladı ki, Azərbaycanın öz ərazisində Zəngəzur dəhlizi ilə bağlı artıq heç bir problemi yoxdur və regionda kommunikasiya xətlərinin açılması qaçılmaz prosesə çevrilib. Azərbaycanla Ermənistan arasında yolların açılması Cənubi Qafqazda uzunmüddətli sülh və əməkdaşlıq üçün yeni imkanlar yaradır.

Dövlət başçısı son beş il ərzində ordu quruculuğunun fasiləsiz və sistemli şəkildə aparıldığını qeyd edərək, İkinci Qarabağ müharibəsində əldə edilən Qələbənin arxayınlıq yaratmadığını, əksinə, daha güclü və çevik Silahlı Qüvvələrin formalaşdırılmasına təkan verdiyini bildirdi. Güclü tərəflərlə yanaşı, mövcud çatışmazlıqların aradan qaldırılması, yeni silahlanma və silahlı dəstələrin yaradılması prosesi paralel şəkildə həyata keçirilib. Zərurət yarandıqda isə alternativ vasitələr ölçülü və tam nəzarət altında tətbiq olunub.

Bu gün Azərbaycanın hərbi sənaye kompleksi sürətlə inkişaf edir. Artıq 7 özəl şirkət hərbi təyinatlı məhsullar istehsal edir və ötən il bu sahədə 1,4 milyard manatlıq məhsul istehsal olunub. Bu fakt ölkənin müdafiə sahəsində xarici asılılığını minimuma endirdiyini və strateji müstəqilliyini gücləndirdiyini göstərir.

Prezident İlham Əliyev beynəlxalq hüququn norma və prinsiplərinin faktiki olaraq işləmədiyini, beynəlxalq münasibətlərin isə son dərəcə gözlənilməz məcrada inkişaf etdiyini açıq şəkildə ifadə etdi. Bununla belə, İkinci Qarabağ müharibəsindən beş il sonra beynəlxalq ictimaiyyətin, aparıcı dövlətlərin və nüfuzlu beynəlxalq təşkilatların yeni reallıqları qəbul etdiyini xüsusi vurğuladı.

Azərbaycanın mövqeyi dəyişməzdir: ölkə hər zaman həqiqətə və ədalətə sadiq olub və kiminsə maraqları naminə Azərbaycan vətəndaşlarının həyatını və sağlamlığını riskə atmaq niyyətində deyil. Yaxın Şərqlə bağlı məsələlərdə də bu prinsip əsas götürülür. ABŞ-ın BMT-dəki səfirliyinin Azərbaycanın razılığı ilə bağlı bəyanatının təəccüb doğurması da məhz bu müstəqil mövqenin göstəricisidir.

Müsahibədə enerji təhlükəsizliyi və “yaşıl enerji” gündəliyi də ön plana çıxarıldı. Prezident qeyd etdi ki, Azərbaycanın təkcə külək enerjisi potensialı 150 giqavatdan artıqdır və qısamüddətli planlar çərçivəsində 8 giqavat enerji əldə edilməsi nəzərdə tutulur. Cənubi Qafqazda, Orta Asiyada və yaxın regionda bu qədər sərbəst enerji gücünə malik ikinci ölkənin olmaması Azərbaycanın strateji üstünlüyünü bir daha təsdiqləyir.

Bununla yanaşı, yol-nəqliyyat sisteminin idarə edilməsi, mikromobilliyin inkişafı və ictimai nəqliyyata üstünlük verilməsi şəhər mühitində dayanıqlı inkişaf üçün çıxış yolu kimi dəyərləndirildi.

Ümumilikdə, Prezident İlham Əliyevin müsahibəsi Azərbaycanın yeni reallıqlar dövründə güc amili, iqtisadi dayanıqlıq, enerji liderliyi və müstəqil siyasi xətt üzərində qurulmuş strateji baxışını aydın şəkildə ortaya qoyur.

           Aytən İmanova

           YAP fəalı, Hacıqabul rayon Heydər Əliyev Mərkəzinin direktoru