Azərbaycan Respublikası 2026-cı ilə bütün sahələr üzrə böyük uğurlar və mühüm nailiyyətlərlə qədəm qoymuşdur. 2025-ci il ölkəmizin müasir tarixində sosial-iqtisadi inkişafın, siyasi sabitliyin və dövlət idarəçiliyində səmərəliliyin daha da möhkəmləndiyi növbəti uğurlu mərhələ kimi yadda qalmışdır. Ötən il ərzində həyata keçirilən ardıcıl islahatlar, genişmiqyaslı sosial proqramlar və investisiyayönümlü iqtisadi siyasət Azərbaycanın dayanıqlı inkişaf modelinin real nəticələrini bir daha nümayiş etdirmişdir.

Yanvarın 5-də Azərbaycan Respublikasının Prezidenti İlham Əliyevin artıq ənənəyə çevrilmiş yerli televiziya kanallarına müsahibəsi 2025-ci ilin yekunları və qarşıdakı dövrün əsas prioritetləri baxımından mühüm siyasi və ictimai əhəmiyyət daşıyır. Dövlət başçısı müsahibə zamanı jurnalistlərin ölkədə iqtisadi və sosial sahələrdə görülən işlərə, xarici və daxili siyasətə, o cümlədən Azərbaycan–ABŞ münasibətlərinə dair suallarını ətraflı və əsaslandırılmış şəkildə cavablandırmışdır.

Prezident İlham Əliyevin müsahibəsi bir daha göstərdi ki, Azərbaycan dövləti öz inkişaf strategiyasını milli maraqlara, sosial ədalətə və vətəndaş rifahına əsaslanan konsepsiya üzərində qurur.

Müsahibədə Prezident İlham Əliyev cəmiyyətin hər bir üzvünü birbaşa maraqlandıran sosial siyasət məsələlərinə xüsusi yer ayırmışdır. Dövlət başçısı vurğulamışdır ki, sosial siyasət hər zaman Azərbaycan dövlətinin siyasətinin ana xəttini təşkil edib. Bu siyasətin mərkəzində isə bilavasitə Azərbaycan vətəndaşı dayanır. Ölkənin ümumi siyasəti həm sosialyönümlü, həm də investisiyayönümlü olmaqla paralel şəkildə həyata keçirilir.

Son 20 ilin statistik göstəriciləri bu siyasətin uğurla reallaşdırıldığını aydın şəkildə sübut edir. Bu müddət ərzində Azərbaycanda minimum əməkhaqqı 40 dəfədən çox artırılıb. Geniş iqtisadi islahatlar aparılıb, iri neft-qaz layihələri icra olunub və bu layihələrdən əldə edilən gəlirlər məqsədyönlü şəkildə sosial sahəyə yönəldilib.

Prezident İlham Əliyev bu məsələyə toxunaraq bildirib:

“İşğal dövründə bizim əsas xərclərimiz hərbi təyinatlı xərclər idi, ondan sonra təhsil xərcləri idi, ondan sonra məcburi köçkünlər üçün nəzərdə tutulan xərclər idi. Biz işğal dövründə 300 mindən çox köçkünü yeni evlərlə, mənzillərlə təmin etmişdik, 100-dən çox şəhərcik inşa olunmuşdur”.

Prezident İlham Əliyev qeyd etmişdir ki, vaxtilə sosial sahədə mövcud olan pozuntular və ədalətsizliklər aradan qaldırılıb, şəffaf və ədalətli mexanizmlər tətbiq olunub. Məhz bu yanaşma son illərdə genişmiqyaslı sosial islahat paketlərinin icrasına imkan yaradıb.

Dövlət başçısının sözlərinə görə, son yeddi il ərzində 5 ciddi sosial islahat paketi həyata keçirilib. Bu islahatlar 4 milyondan çox vətəndaşı əhatə edib və təqribən 8 milyard manata yaxın vəsait sosial təminatın gücləndirilməsinə yönəldilib.

Müsahibədə vurğulanıb ki, işğal dövründə 300 mindən çox məcburi köçkün yeni mənzillərlə təmin edilib, 100-dən artıq yaşayış şəhərciyi inşa olunub. Təkcə ötən il bu məqsədlər üçün dövlət büdcəsindən 1,4 milyard manat vəsait ayrılıb. Eyni zamanda, ölkədə maaşların, pensiyaların və sosial müavinətlərin mütəmadi artırılması, pensiyaların indeksləşdirilməsi sosial dövlət prinsipinin praktiki təzahürüdür.

Son illərdə uğurla tətbiq edilən özünüməşğulluq proqramı da dövlətin sosial siyasətində mühüm yer tutur. Artıq 100 mindən çox insan bu proqramla əhatə olunub. Özünüməşğulluq proqramı işsizliyin azalmasına, vətəndaşların iqtisadi fəallığının artmasına və ailə büdcələrinin formalaşmasına real töhfə verir.

Qarabağ və Şərqi Zəngəzur da daxil olmaqla ölkənin bütün bölgələrində yeni iş yerləri yaradılır, regional inkişaf siyasəti ardıcıl şəkildə həyata keçirilir.

Azərbaycan dövləti Vətən uğrunda canından keçmiş şəhidlərin ailələrinə və müharibə əlillərinə xüsusi diqqət və qayğı göstərir. Son illərdə 16 min şəhid ailəsi və müharibə əlili dövlət tərəfindən mənzillərlə təmin edilib və bu proses bu gün də davam etdirilir.

Müharibə zamanı əlil olmuş hərbi qulluqçular dövlət tərəfindən ən müasir protezlərlə təmin olunur. Artıq 500-dən çox şəxs bu protezlər vasitəsilə normal həyata qayıdıb. Həmin kateqoriyadan olan vətəndaşlara minik avtomobilləri verilir. Bu sahədə göstərilən qayğı və sosial dəstək dünya miqyasında nadir nümunələrdəndir.

Son 20 il ərzində Azərbaycanda 3 min 600 məktəb, yüzlərlə xəstəxana və tibb müəssisəsi tikilmiş və ya əsaslı təmir olunmuşdur. Təhsil və səhiyyə sahələrində aparılan islahatlar insan kapitalının inkişafına, cəmiyyətin uzunmüddətli rifahına xidmət edir.

Prezident İlham Əliyevin qeyd etdiyi kimi, iqtisadiyyatın artımı ilk növbədə sosial sahələrə ayrılan vəsaitin həcmini artırır. Bu yanaşma Azərbaycan dövlətinin iqtisadi və sosial siyasətinin ayrılmaz tərkib hissəsidir.

Prezident İlham Əliyevin yerli televiziya kanallarına müsahibəsi bir daha sübut etdi ki, Azərbaycan güclü iqtisadiyyata, sosial ədalətə və vətəndaş rifahına əsaslanan müasir dövlət modelini uğurla reallaşdırır. 2026-cı ilə böyük uğurlarla daxil olan Azərbaycan qarşıdakı illərdə də davamlı inkişaf yolunda inamla irəliləyəcək, əldə olunan nailiyyətlər daha da möhkəmləndiriləcəkdir.

Bayram Xudayarov

Elm və Təhsil Nazirliyi Fizika İnstitutunun əməkdaşı, “Heydər Əliyev məktəbinin davamçıları” Facebook qrupunun təsisçisi və rəhbəri, YAP-ın fəal üzvü.