8 yanvar 2026-cı ildə Prezident İlham Əliyevin iştirakı ilə “Xızı–Abşeron” Külək Elektrik Stansiyasının rəsmi açılışı Azərbaycanın enerji siyasətində və “yaşıl enerji” strategiyasında mühüm mərhələ kimi tarixə düşdü. Dövlət başçısının mərasimdəki çıxışı ölkəmizin iqtisadi gücünü, investisiya cəlbediciliyini və maliyyə sabitliyini bir daha nümayiş etdirdi.

Prezident İlham Əliyev çıxışında vurğuladı ki, Azərbaycanda formalaşmış sabit siyasi mühit və düşünülmüş iqtisadi siyasət nəticəsində ölkəmizdə son dərəcə əlverişli investisiya iqlimi mövcuddur. Təsadüfi deyil ki, bu günədək Azərbaycana 300 milyard dollardan artıq xarici sərmayə cəlb olunub. Bu rəqəm ölkəyə olan yüksək beynəlxalq etimadın və həyata keçirilən islahatların real nəticəsidir.

Dövlət başçısı xüsusilə qeyd etdi ki, cəlb olunan investisiyalar təkcə neft-qaz sektoruna deyil, eyni zamanda qeyri-neft sahələrinə, o cümlədən bərpa olunan enerji layihələrinə yönəldilir. “Xızı–Abşeron” Külək Elektrik Stansiyası da bu siyasətin bariz nümunəsidir və Azərbaycanın yaşıl enerjiyə keçid prosesində mühüm rol oynayacaq.

Prezident İlham Əliyev çıxışında ölkəmizin maliyyə dayanıqlılığına da diqqət çəkdi. Bildirdi ki, Azərbaycanın xarici borcu çox aşağı səviyyədədir və ümumi daxili məhsulun təqribən 6 faizindən bir qədər çoxunu təşkil edir. Bu göstərici Azərbaycanı dünya miqyasında ən az borcu olan ölkələr sırasına daxil edir və güclü iqtisadi idarəetmənin nəticəsidir.

“Xızı–Abşeron” Külək Elektrik Stansiyasının istifadəyə verilməsi həm enerji təhlükəsizliyinin möhkəmləndirilməsinə, həm də ətraf mühitin qorunmasına mühüm töhfə verəcək. Layihə eyni zamanda regionlarda yeni iş yerlərinin yaradılmasına və iqtisadi fəallığın artmasına xidmət edir.

Prezident İlham Əliyevin çıxışı bir daha göstərdi ki, Azərbaycan yalnız bugünkü iqtisadi uğurlarla kifayətlənmir, eyni zamanda gələcək nəsillər üçün dayanıqlı, müasir və ekoloji cəhətdən təmiz enerji sistemi qurmağı strateji hədəf kimi qarşıya qoyub.

            Dövran Həsənov,

YAP Hacıqabul rayon təşkilatının ərazi partiya təşkilat sədri, hacıqabul rayon Mərkəzi Kitabxanasının direktoru.