Gənclik bir millətin yaşaması, inkişafı üçün təməl daşıdır. Çünki hər bir ölkədə dövlətçiliyin, müstəqilliyin daha da möhkəmləndirilməsi, gələcəyin etibarlı təminatı intellektual səviyyəli potensial kadrların yetişdirilməsindən, onların aparıcı qüvvəyə çevrilməsindən çox asılıdır. Gənclərimizin vətənpərvər ruhunda tərbiyə olunması mənsub olduğumuz xalqımızın rifahının, ölkəmizin çiçəklənməsinin bir növ rəhnidir. Bu gün böyük iftixarla demək olar ki, müasir Azərbaycan gəncliyi milli mənəvi dəyərlərimizi, doğma ana dilimizi, ata-babalarımızdan qalan gözəl adət-ənənələrimizi göz bəbəyi kimi qoruyub saxlayır və yaşadır.1993-cü ildən - Ulu Öndər Heydər Əliyevin hakimiyyətə qayıdışından etibarən gənc nəslə xüsusi diqqət dövlət siyasətinin prioritet istiqamətlərindən birinə çevrildi. Azərbaycan gənclərinin Vətənə sədaqət ruhunda tərbiyə edilməsi Ümumilli Liderin azərbaycançılıq ideologiyasının mühüm istiqamətlərindən biridir. Son 33 ildə hər bir Azərbaycan gənci öz həyat yolunu müstəqil Azərbaycan Respublikasının gələcək yolu kimi qəbul etməkdədir.Azərbaycan Respublikası Prezidenti İlham Əliyev həmin ənənəni layiqincə davam etdirməsi nəticəsində ölkəmizin gənclər siyasətində çox ciddi uğurlara imza atıldı. Cəmiyyətin bütün sferalarında gənclər irəli çəkildilər, xaricdə təhsil almağa göndərildilər, mədəniyyətdən sosial həyata, iqtisadiyyatdan idarəetməyə bütün sahələrdə gəncləşmə aparılan uğurlu islahatların əsas tərkib hissəsinə çevrildi.Gənclərin potensialından səmərəli istifadə olunması, onların beynəlxalq təmsilçiliyinə dəstək müasir, müstəqil Azərbaycanın inkişafını təmin edən əsas faktorlardan biridir. Prezident İlham Əliyevin gənclərin potensialının gerçəkləşməsinə, onların vətənpərvər, savadlı kadr kimi yetişməsinə, gənc ailələrin sosial təminatına yönələn tədbirləri dövlətin uzaqgörən siyasətinin nəticəsi kimi qiymətləndirilməlidir. Məhz dövlətin gənclərə dəstək və diqqəti nəticəsində Azərbaycan gəncliyində özünə, öz gücünə, istedadına inam hissi daha da artıb.Bu gün Azərbaycan gənclərinin inkişafında həm də Heydər Əliyev Fondunun misilsiz töhfəsi vardır. Azərbaycanlı gənclərinin fərdi və peşəkar inkişafı naminə Heydər Əliyev Fondu bir sıra istiqamətlər üzrə fəaliyyət göstərir və minlərlə müxtəlif təyinatlı layihələri icra edir. Bu istiqamətlər üzrə Fond elm, təhsil, mədəniyyət, səhiyyə, idman, ekoloji sahələrə aid proqram və layihələr hazırlayıb həyata keçirir, gənclərin yaradıcı potensialının, bilik və bacarıqlarının aşkara çıxarılmasına, qabiliyyətlərini göstərməsinə, inkişaf etdirməsinə yardım edir, uşaq və gənclərin hərtərəfli biliklərə malik vətəndaş kimi yetişdirilməsi işinə xidmət edir, xarici ölkələrin tanınmış elmi-tədqiqat mərkəzləri ilə alimlərin mübadiləsini təşkil etmək, ölkənin yaradıcı və elmi potensialının artırılmasına kömək edir. Heydər Əliyev Fondu, Azərbaycan gəncləri ilə dünya arasında körpü rolunu oynayır. Fondun təşkil etdiyi beynəlxalq tədbirlər və layihələr, gənclərin digər ölkələrdən olan həmyaşıdları ilə əlaqə qurmasına və dünya miqyasında təcrübə qazanmalarına imkan yaradır. Bu əlaqələr gənclərin dünyagörüşünü genişləndirir, onların müxtəlif mədəniyyətlərlə tanış olmalarına və qlobal problemlərə qarşı həssas olmalarına şərait yaradır. Beynəlxalq təcrübə mübadiləsi həmçinin, gənclərin peşəkar bacarıqlarını inkişaf etdirmələrinə, fərqli iş mühitlərinə adaptasiya olmalarına və qlobal bazarda rəqabət qabiliyyətlərini artırmalarına kömək edir. Azərbaycan gəncləri artıq dünyanın bir çox aparıcı şirkətlərində uğurla təmsil olunur, ölkəmizin tanıdılması istiqamətində uğurla fəaliyyət göstərirlər.

Könül Məmmədova,

YAP Neftçala rayon təşkilatı ərazi partiya təşkilat sədri

ETİHİ Neftçala Rayon Komitəsinin sədri