2 Fevral – Azərbaycan Gəncləri Günü ölkəmizin ictimai-siyasi həyatında xüsusi əhəmiyyətə malik əlamətdar günlərdən biridir. Bu gün müstəqil Azərbaycanın gələcəyini formalaşdıran, dövlətçiliyimizin dayağı olan gənclərin potensialına, intellektinə və vətənpərvərliyinə verilən yüksək dəyərin təcəssümüdür.

Ulu Öndər Heydər Əliyev gənclərin cəmiyyətdəki rolunu xüsusi vurğulayaraq demişdir: “Bizim xalqımızın gələcəyi gənclərdir…” Bu fikirlər bu gün də öz aktuallığını qoruyur və Azərbaycan gəncliyi üçün yol xəritəsi rolunu oynayır. Sağlam düşüncəli, bilikli və mənəvi dəyərlərə sadiq gənclərin yetişdirilməsi dövlət siyasətinin əsas istiqamətlərindən biridir.

Prezident İlham Əliyevin qeyd etdiyi kimi, müasir dövrdə Azərbaycan gəncləri daha geniş imkanlara malikdir. Azad, sabit və güclü dövlətdə yaşayan gənclər bu imkanlardan düzgün istifadə etməli, həm şəxsi inkişafları, həm də dövlətin maraqları naminə fəal mövqe nümayiş etdirməlidirlər.

Bu gün Azərbaycan gəncliyi yalnız sosial-iqtisadi inkişafda deyil, həm də informasiya müharibəsinin ön cəbhəsində fəal iştirak edir. Milli maraqların müdafiəsində, həqiqətlərin dünya ictimaiyyətinə çatdırılmasında gənclərin rolu danılmazdır.

Azərbaycan eyni zamanda idman ölkəsi kimi də tanınır. Bakıda keçirilmiş Birinci Avropa Oyunları dünya idman tarixində ilk olmaqla ölkəmizin idman sahəsində qazandığı böyük nüfuzun göstəricisidir. Dövlətin idmançılara göstərdiyi diqqət və qayğı nəticəsində gənc idmançılarımız beynəlxalq arenalarda uğurla çıxış edərək bu etimadı doğruldurlar.

İstedadlı və vətənpərvər gənclərə göstərilən dövlət qayğısı, Heydər Əliyev Fondunun gənclərin inkişafına verdiyi misilsiz töhfələr, təhsil və mədəniyyət sahəsində həyata keçirilən layihələr bu siyasətin mühüm tərkib hissəsidir. Gənclərin xaricdə təhsilinə yaradılan imkanlar, 2026–2027-ci tədris ili üzrə universitet və proqramların təsdiqlənməsi də insan kapitalının gücləndirilməsinə xidmət edir.

Bu gün Azərbaycan gəncliyi öz gücü, biliyi və vətənpərvərliyi ilə müstəqil dövlətimizin sabahını inamla qurur. Gənclərimizlə fəxr edirik, çünki güclü dövlətin əsas təminatı güclü və düşünən gənclikdir.

            Aytən İmanova,

            YAP fəalı, Hacıqabul rayon Heydər Əliyev Mərkəzinin direktoru.