Azərbaycan Respublikasının Prezidenti İlham Əliyev və İtaliya Respublikası Nazirlər Şurasının sədri Ciorcia Meloni arasında 2026-cı il mayın 4-də Bakıda keçirilmiş görüş və verilmiş birgə bəyanatlar iki ölkə arasında münasibətlərin keyfiyyətcə yeni mərhələyə qədəm qoyduğunu bir daha nümayiş etdirdi. Bu səfər yalnız diplomatik təmasların davamı deyil, eyni zamanda Azərbaycan–İtaliya strateji tərəfdaşlığının dərinləşməsi baxımından mühüm siyasi hadisə kimi tarixə düşür.

Məlumdur ki, Azərbaycan ilə İtaliya arasında münasibətlər uzun illərdir qarşılıqlı etimada, ortaq maraqlara və praqmatik əməkdaşlığa əsaslanır. İtaliya Azərbaycanın Avropa İttifaqı daxilində ən böyük ticarət tərəfdaşı olmaqla yanaşı, həm də ölkəmizin enerji resurslarının əsas idxalçılarından biridir. Prezident İlham Əliyevin bəyanatında da vurğulandığı kimi, bu əlaqələr artıq sadəcə iqtisadi tərəfdaşlıq çərçivəsindən çıxaraq geniş strateji mahiyyət kəsb edir. Dövlət başçısının qeyd etdiyi kimi, Azərbaycan ilə İtaliya arasında siyasi dialoq yüksək səviyyədədir və müntəzəm xarakter daşıyır ki, bu da münasibətlərin dayanıqlı inkişafını təmin edən əsas amillərdəndir.

Görüş zamanı səsləndirilən fikirlərdən aydın olur ki, Bakı ilə Roma arasında əməkdaşlıq yalnız enerji və ticarət sahələri ilə məhdudlaşmır. Humanitar, mədəni, təhsil və sənaye sahələrində də əməkdaşlıq genişlənməkdədir. Bu isə iki ölkə arasında münasibətlərin çoxşaxəli xarakter aldığını göstərir. Xüsusilə, son illərdə İtaliya şirkətlərinin Azərbaycanın müxtəlif sektorlarında fəal iştirakı, sənaye parklarında və infrastruktur layihələrində yer alması iqtisadi əməkdaşlığın real nəticələrini ortaya qoyur.

Prezident İlham Əliyev bəyanatında Azərbaycanın etibarlı tərəfdaş kimi formalaşdığını xüsusi vurğulayaraq bildirmişdir ki, ölkəmiz beynəlxalq öhdəliklərinə sadiq qalaraq tərəfdaş dövlətlərlə münasibətlərini qarşılıqlı hörmət və etimad əsasında qurur. Bu kontekstdə İtaliya ilə əməkdaşlıq nümunəvi xarakter daşıyır. Azərbaycanın enerji siyasəti, xüsusilə təbii qaz ixracı sahəsində həyata keçirdiyi layihələr Avropanın enerji təhlükəsizliyində mühüm rol oynayır və İtaliya bu prosesdə aparıcı mövqedədir.

Digər tərəfdən, Ciorcia Meloni də öz çıxışında Azərbaycan ilə münasibətlərə xüsusi önəm verdiklərini qeyd etmiş, ölkəmizin regionda oynadığı mühüm rolu yüksək qiymətləndirmişdir. Onun vurğuladığı kimi, Azərbaycan sabitlik və əməkdaşlıq platforması kimi çıxış edir və bu baxımdan İtaliya ilə tərəfdaşlıq yalnız ikitərəfli deyil, həm də regional və qlobal əhəmiyyət daşıyır.

Qeyd olunmalıdır ki, Azərbaycan–İtaliya münasibətlərinin bu səviyyəyə çatması təsadüfi deyil. Bu, uzunmüddətli düşünülmüş siyasətin, qarşılıqlı maraqların düzgün uzlaşdırılmasının və siyasi iradənin nəticəsidir. Xüsusilə, Prezident İlham Əliyevin rəhbərliyi ilə həyata keçirilən uğurlu xarici siyasət kursu Azərbaycanın beynəlxalq nüfuzunu əhəmiyyətli dərəcədə artırmış, ölkəmizi etibarlı tərəfdaş kimi tanıtmışdır.

Eyni zamanda, bu səfər bir daha göstərdi ki, Azərbaycan Avropa dövlətləri ilə münasibətlərini balanslı və qarşılıqlı fayda prinsipləri əsasında inkişaf etdirir. İtaliya ilə əməkdaşlıq isə bu siyasətin ən uğurlu nümunələrindən biri kimi çıxış edir. Mövcud dinamika onu deməyə əsas verir ki, yaxın perspektivdə iki ölkə arasında əlaqələr daha da genişlənəcək, yeni sahələri əhatə edəcək və strateji tərəfdaşlıq daha da möhkəmlənəcəkdir.

Elman Quliyev,

YAP Neftçala rayon təşkilatı ərazi partiya təşilatının sədri

Neftçala Rayon Mərkəzi Xəstəxanası PHŞ-nin direktoru