Azərbaycan Respublikasının Prezidenti İlham Əliyev və İtaliya Respublikası Nazirlər Şurasının sədri Ciorcia Meloni arasında 2026-cı il mayın 4-də keçirilmiş görüş zamanı səsləndirilən fikirlər bir daha təsdiqlədi ki, İtaliya Azərbaycanın xarici ticarət siyasətində xüsusi yer tutur və bu mövqe ildən-ilə daha da möhkəmlənir. Dövlət başçısının bəyanatında qeyd olunduğu kimi, İtaliya uzun müddətdir Azərbaycanın bir nömrəli ticarət tərəfdaşıdır və bu istiqamətdə əldə olunmuş nəticələr iki ölkə arasında iqtisadi əməkdaşlığın yüksək səviyyəsini nümayiş etdirir.

Məlumdur ki, Azərbaycan ilə İtaliya arasında ticarət dövriyyəsi son illərdə rekord həddə çatmışdır. Bu dinamika, ilk növbədə, enerji sektorunda sıx əməkdaşlıqla bağlı olsa da, artıq qeyri-neft sahələrində də artım müşahidə olunur. Prezident İlham Əliyevin vurğuladığı kimi, iqtisadi əlaqələrin şaxələndirilməsi Azərbaycan üçün prioritet istiqamətlərdən biridir və bu baxımdan İtaliya ilə əməkdaşlıq yeni mərhələyə qədəm qoyur. Xüsusilə, sənaye, kənd təsərrüfatı, logistika və yüksək texnologiyalar sahəsində qarşılıqlı maraqların genişlənməsi ticarət münasibətlərinin dayanıqlı inkişafına xidmət edir.

İtaliya Azərbaycanın Avropa bazarlarına çıxışında mühüm rol oynayan əsas tərəfdaşlardan biridir. Bu ölkə vasitəsilə Azərbaycan məhsulları Avropa məkanında daha geniş coğrafiyaya çatdırılır. Eyni zamanda, İtaliya şirkətlərinin Azərbaycanın iqtisadiyyatına yatırdığı investisiyalar da diqqətəlayiqdir. Bu investisiyalar yalnız enerji sektorunu deyil, həm də tikinti, infrastruktur və sənaye sahələrini əhatə edir ki, bu da əməkdaşlığın çoxşaxəli xarakter aldığını göstərir.

Prezident İlham Əliyev çıxışında Azərbaycanın əlverişli investisiya mühitinə malik olduğunu xüsusi vurğulamış və xarici investorlar üçün yaradılmış şəraitin davamlı olaraq təkmilləşdirildiyini qeyd etmişdir. Bu siyasətin nəticəsidir ki, İtaliya iş adamları Azərbaycanda fəaliyyətlərini genişləndirir və yeni layihələrə maraq göstərirlər. Bu isə öz növbəsində ticarət dövriyyəsinin artmasına və iqtisadi əlaqələrin daha da dərinləşməsinə gətirib çıxarır.

Digər tərəfdən, Ciorcia Meloni də öz bəyanatında Azərbaycan ilə iqtisadi əməkdaşlığın inkişafından məmnunluğunu ifadə etmiş, ölkəsinin Azərbaycanla ticarət əlaqələrini genişləndirməkdə maraqlı olduğunu bildirmişdir. Onun sözlərinə görə, Azərbaycan etibarlı tərəfdaş olmaqla yanaşı, həm də regionda mühüm iqtisadi aktor kimi çıxış edir və bu amil İtaliya üçün xüsusi əhəmiyyət daşıyır.

Qeyd edilməlidir ki, Azərbaycan–İtaliya ticarət əlaqələrinin uğurla inkişaf etməsi təsadüfi deyil. Bu, hər iki ölkənin iqtisadi maraqlarının üst-üstə düşməsi, qarşılıqlı etimad mühitinin formalaşması və uzunmüddətli strateji yanaşmanın nəticəsidir. Azərbaycanın həyata keçirdiyi iqtisadi islahatlar, biznes mühitinin yaxşılaşdırılması və beynəlxalq layihələrdə fəal iştirakı ölkəmizi xarici tərəfdaşlar üçün cəlbedici məkana çevirib.

Bütün bunlar onu göstərir ki, İtaliya Azərbaycanın ticarət tərəfdaşları arasında lider mövqeyini qorumaqla yanaşı, bu mövqeni daha da gücləndirməkdədir. Mövcud əməkdaşlıq potensialı və qarşılıqlı maraqlar nəzərə alındıqda, yaxın illərdə ticarət dövriyyəsinin daha da artacağı və yeni istiqamətlər üzrə əməkdaşlığın genişlənəcəyi şübhə doğurmur.

Səmədağa Hümbətov,

YAP Neftçala rayon təşkilatı ərazi partiya təşkilatının sədri

“İODİCO” MMC-nin əməkdaşı