Hər bir xalqın tarixində onun varlığını, gələcək taleyini və dövlətçilik xəttini müəyyən edən strateji dönüş nöqtələri mövcuddur. Azərbaycan xalqı üçün belə bir tarixi milad heç şübhəsiz ki, 15 İyun – Milli Qurtuluş Günüdür. Bu gün sadəcə təqvim dəyişikliyi deyil, real təhdidlər qarşısında suverenliyin müdafiəsi və möhkəmləndirilməsi prosesinin, bütöv bir dövlətin uçurumun kənarından xilas edilməsinin rəsmi başlanğıcıdır. Prezident İlham Əliyevin də qeyd etdiyi kimi: “Danılmaz həqiqətdir ki, Azərbaycanın müasir və müstəqil dövlət kimi mövcudluğu, inkişafı XX əsrdə ikinci dəfə qazandığımız müstəqilliyin ilk illərinə təsadüf edən Milli Qurtuluş Günü ilə əlaqədardır. Qurtuluş Günü Azərbaycan tarixində dönüş nöqtəsi idi”.

1990-cı illərin əvvəllərində müstəqilliyini yenicə bərpa etmiş Azərbaycan Respublikası son dərəcə mürəkkəb geo-iqtisadi və hərbi-siyasi böhran içərisində boğulurdu. 1992-ci ilin iyun ayında hakimiyyətə gələn AXC üzvləri, dövlət idarəçiliyini təmin etmək əvəzinə, dərhal bir-biri ilə mübarizəyə başlamışdılar. Səriştəsiz idarəçilik daxili iddiaları alovlandırır, hakimiyyət çəkişmələri isə ölkəni vətəndaş müharibəsinin astanasına gətirirdi. Bu daxili xaos xarici təhdidlərin təsir daxilini daha da genişləndirirdi. Ulu Öndər Heydər Əliyev həmin dövrün mənzərəsini elmi-fəlsəfi dəqiqliklə belə xarakterizə edirdi: “Azərbaycan böyük təhlükə qarşısında idi. Çünki Azərbaycanın müstəqil yaşamasının əleyhinə olan həm daxildəki qüvvələr güclü idi, həm də Azərbaycan kimi böyük coğrafi-strateji əhəmiyyətə, zəngin təbii sərvətlərə malik olan ölkənin tam müstəqil olması başqa ölkələrdə bəzi dairələri qane etmirdi. Ermənistanın Azərbaycana etdiyi təcavüz və bunun nəticəsində Azərbaycanın zəifləməsi, məğlubiyyətə uğraması, ikinci tərəfdən də daxildə hakimiyyət çəkişməsi 1992-ci ilin iyun ayında hakimiyyətə gəlmiş qüvvələri bir ildən sonra hakimiyyətdən saldı, xalq özü saldı”.

Dövlətin parçalanma və xəritədən silinmə təhlükəsi qarşısında xalq öz yeganə ümid pənahına – dahi dövlət xadimi Heydər Əliyevə üz tutdu. Bakıya dəvət olunan və 15 iyun 1993-cü ildə Ali Sovetin sədri seçilən Ulu Öndər, üzərinə götürdüyü bu tarixi missiya ilə Azərbaycanın xilaskarı oldu. Heydər Əliyev rəhbərliyə gəldiyi ilk andan etibarən dövlətin xəttini müəyyən etdi və Ali Sovet kürsüsündən xalqa strateji vədini verdi: “Mənə bu gün böyük etimad göstərdiyinə görə Milli Məclisin üzvlərinə, Azərbaycanın Ali Sovetinə minnətdarlığımı bildirirəm və sizi əmin edirəm ki, bütün imkanlardan istifadə edib bu böyük vəzifəni, ağır bir yükü aparmağa çalışacağam və bu vəzifənin ləyaqətlə yerinə yetirilməsinə səy edəcəyəm. Bildirmək istəyirəm ki, Azərbaycan Respublikasının bugünkü ağır, mürəkkəb və gərgin vəziyyətini tam məsuliyyətlə dərk edirəm. Bu vəzifəni üzərimə götürərək öz məsuliyyətimi anlayıram və bunların hamısını rəhbər tutaraq əlimdən gələni edəcəyəm. Ali Sovetin sədri kimi Azərbaycan xalqının tarixi nailiyyəti olan Azərbaycan Respublikasının dövlət müstəqilliyini qorumağı, möhkəmləndirməyi, inkişaf etdirməyi özüm üçün ən əsas vəzifələrdən biri hesab edirəm. Azərbaycan Respublikasının dövlət müstəqilliyi 1918-ci ildə yaranmış ilk Azərbaycan Demokratik Respublikasının ənənələri əsasında, müasir tələblərlə, dünyada gedən proseslərlə bağlı olaraq təmin olunmalıdır. Bu sahədə mən daim çalışacağam və heç kəsin şübhəsi olmasın ki, ömrümün bundan sonrakı hissəsini harada olursa-olsun, yalnız və yalnız Azərbaycan Respublikasının müstəqil dövlət kimi inkişaf etməsinə həsr edəcəyəm”. Ulu Öndərin bu unudulmaz bəyanatı onun sonrakı fəaliyyətinin əsas formulasına çevrildi: “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır”.

Tarixçilər və sosioloqlar Ümummilli Liderin bu misilsiz tarixi missiyasının uğurunu üç mühüm fundamental amillə əlaqələndirirlər: xalqın Heydər Əliyevə olan möhkəm, sarsılmaz inamı və dəstəyi; Heydər Əliyev şəxsiyyətinin böyüklüyü, qüdrəti, əzəməti; Heydər Əliyevin mənsub olduğu Azərbaycan xalqına, Vətəninə sonsuz və təmənnasız sevgisi. Cəmiyyətin lider ətrafında monolit birliyi daxili sabitliyin bərpasında, onun beynəlxalq miqyaslı siyasi təcrübəsi və xarizması isə xarici təzyiqləri neytrallaşdırmaqda həlledici rol oynadı.

Ulu Öndərin dövlətçilik strategiyasının prioritet hədəfi, onun ən böyük arzusu işğal altındakı torpaqlarımızın azad edilməsi, ərazi bütövlüyümüzün bərpası idi. Bu gün qürurla qeyd edə bilərik ki, müasir Azərbaycan məhz Ulu Öndər Heydər Əliyev fenomeninin görmək istədiyi azad, müstəqil, ərazi bütövlüyü və suverenliyi tam təmin olunmuş qüdrətli Azərbaycandır. Şuşada, Xankəndidə dalğalanan üçrəngli bayrağımız Heydər Əliyev ideyalarının zəfəri, onun siyasi kursunun layiqli davamının məntiqi nəticəsidir. Xalqımız dövlətimizi yox olmaqdan xilas edən, bizə mənliyimizi və müstəqilliyimizi qaytaran Ulu Öndər Heydər Əliyevin əziz xatirəsini həmişə uca tutur. 15 İyun sadəcə keçmişə ehtiram günü deyil, həm də gələcəyə inamla baxan güclü Azərbaycanın rəmzidir.

            Hökmalı Mirzəyev,

            YAP Hacıqabul rayon təşkilatının sədr müavini.