Azərbaycan xalqının müasir tarixində 15 İyun – Milli Qurtuluş Günü taleyüklü hadisə, dövlətçiliyimizin xilası və gələcək inkişaf yolunun başlanğıcı kimi xüsusi yer tutur. Bu gün yalnız siyasi hakimiyyət dəyişikliyi deyil, həm də Azərbaycan dövlətinin müstəqilliyinin qorunması, milli birliyin təmin edilməsi və ölkənin parçalanmaq təhlükəsindən xilas olması ilə əlamətdardır.

1990-cı illərin əvvəllərində Azərbaycan çox ağır sınaqlarla üz-üzə qalmışdı. Ermənistanın hərbi təcavüzü nəticəsində torpaqlarımızın bir hissəsi işğal edilmiş, ölkə daxilində siyasi böhran, hakimiyyət uğrunda mübarizə və xaos hökm sürmüşdü. Dövlət müstəqilliyi ciddi təhlükə qarşısında idi. Belə bir mürəkkəb zamanda Azərbaycan xalqının təkidli tələbi ilə Ulu Öndər Heydər Əliyevin yenidən siyasi hakimiyyətə qayıdışı ölkəmizin tarixində yeni bir mərhələnin əsasını qoydu.

1993-cü il iyunun 15-də Heydər Əliyevin Azərbaycan Respublikası Ali Sovetinin sədri seçilməsi xalqın ümidlərinin gerçəyə çevrilməsi idi. Ulu Öndər bu məsuliyyətli vəzifəni qəbul edərkən dövlət müstəqilliyinin qorunmasını, möhkəmləndirilməsini və Azərbaycanın gələcək inkişafını özünün ən ali vəzifəsi elan etdi. Onun “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır” fikri bütün siyasi fəaliyyətinin əsas məramını ifadə edirdi.

Heydər Əliyevin xilaskarlıq missiyasının uğur qazanmasında üç mühüm amil xüsusi rol oynadı: xalqın ona olan sonsuz etimadı, onun dərin dövlətçilik təcrübəsi və Azərbaycan xalqına, Vətəninə olan tükənməz sevgisi. Məhz bu uzaqgörən siyasət nəticəsində ölkədə ictimai-siyasi sabitlik bərpa olundu, dövlət quruculuğu prosesi sürətləndi, Azərbaycanın beynəlxalq nüfuzu artdı və davamlı inkişafın möhkəm təməli yaradıldı.

Ulu Öndərin ən böyük arzusu Azərbaycanı güclü, müstəqil və bütöv görmək idi. Bu arzu Prezident İlham Əliyevin rəhbərliyi ilə reallığa çevrildi. Azərbaycanın ərazi bütövlüyü və suverenliyi tam təmin edildi, ölkəmiz regionun ən qüdrətli dövlətlərindən birinə çevrildi.

Bu gün Azərbaycan xalqı Ulu Öndər Heydər Əliyevin əziz xatirəsini daim ehtiramla yad edir. Milli Qurtuluş Günü bir daha göstərir ki, xalqın taleyində həlledici məqamlarda güclü liderlik, milli birlik və Vətən sevgisi dövlətin xilası və inkişafının əsas şərtidir.

Prezident İlham Əliyevin dediyi kimi: “Qurtuluş Günü Azərbaycan tarixində dönüş nöqtəsi idi.” Həqiqətən də 15 İyun 1993-cü ildə başlayan qurtuluş yolu Azərbaycanı bugünkü qüdrətli, müstəqil və qalib dövlət səviyyəsinə yüksəltdi.

            Aytən İmanova,

            YAP fəalı, Hacıqabul rayon Heydər Əliyev Mərkəzinin direktoru.