Hər bir böyük şəxsiyyətin həyatını və fəaliyyətini müəyyən edən ali məqsəd, onu gələcək nəsillərin yaddaşında yaşadan böyük amal olur. Azərbaycan xalqının Ümummilli Lideri Heydər Əliyevin siyasi fəaliyyətinin mərkəzində dayanan ən böyük amal isə güclü, müstəqil, ərazi bütövlüyü və suverenliyi tam təmin olunmuş Azərbaycan dövləti yaratmaq idi. O, müstəqilliyi yalnız siyasi akt kimi deyil, milli iradənin təcəssümü, xalqın gələcəyinin təminatı və dövlətçiliyimizin əbədi yaşamasının əsas şərti kimi qiymətləndirirdi. Bu gün Azərbaycanın əldə etdiyi tarixi nailiyyətlər göstərir ki, Ulu Öndərin ən böyük arzusu reallığa çevrilmişdir.

Müstəqilliyin ilk illərində Azərbaycan son dərəcə mürəkkəb geosiyasi və hərbi vəziyyətlə üzləşmişdi. Ermənistanın hərbi təcavüzü nəticəsində torpaqlarımız işğal edilir, ölkə daxilində siyasi böhran dərinləşir, dövlətçilik ciddi təhlükə altında qalırdı. Belə bir şəraitdə Heydər Əliyev Azərbaycan dövlətinin qorunmasını və möhkəmləndirilməsini qarşıda duran ən vacib vəzifə kimi müəyyənləşdirdi. O, yaxşı anlayırdı ki, müstəqilliyin taleyi yalnız bugünkü problemlərin həlli ilə deyil, gələcək onilliklər üçün düzgün strateji kursun müəyyən olunması ilə bağlıdır.

1993-cü ildə xalqın tələbi ilə hakimiyyətə qayıdan Ulu Öndər ilk növbədə dövlətçiliyin əsaslarını möhkəmləndirdi. İctimai-siyasi sabitliyin təmin olunması, hüquqi dövlət quruculuğu, iqtisadi inkişaf strategiyasının hazırlanması və milli ordunun formalaşdırılması istiqamətində həyata keçirilən tədbirlər Azərbaycanın gələcək uğurlarının təməlini yaratdı. Həmin dövrdə atılan addımların hər biri əslində daha böyük məqsədə – ərazi bütövlüyünün və dövlət suverenliyinin bərpasına xidmət edirdi.

Heydər Əliyev dəfələrlə vurğulayırdı ki, Azərbaycan heç vaxt işğal faktı ilə barışmayacaq və ölkənin ərazi bütövlüyü mütləq bərpa olunacaq. Onun həyata keçirdiyi siyasət nəticəsində Azərbaycan beynəlxalq aləmdə öz haqlı mövqeyini möhkəmləndirdi, iqtisadi və siyasi imkanlarını genişləndirdi, güclü ordu quruculuğunun əsaslarını yaratdı. O dövrdə formalaşdırılan dövlətçilik strategiyası sonrakı tarixi uğurların əsas mənbəyinə çevrildi.

Ulu Öndərin müəyyən etdiyi siyasi kurs Prezident İlham Əliyev tərəfindən yeni dövrün reallıqlarına uyğun şəkildə uğurla davam etdirildi. Dövlət başçısının rəhbərliyi ilə Azərbaycan iqtisadi, siyasi və hərbi baxımdan regionun ən güclü dövlətinə çevrildi. Milli maraqlara əsaslanan prinsipial siyasət nəticəsində ölkəmizin beynəlxalq mövqeləri daha da möhkəmləndi, müdafiə qabiliyyəti əhəmiyyətli dərəcədə gücləndirildi.

Nəticədə Azərbaycan xalqı öz tarixinin ən şanlı səhifələrindən birini yazdı. 2020-ci ildə 44 günlük Vətən müharibəsində əldə edilən möhtəşəm Zəfər Ermənistanın uzun illər davam edən işğal siyasətinə son qoydu. Azərbaycan Ordusu Ali Baş Komandan İlham Əliyevin rəhbərliyi ilə torpaqlarımızı işğaldan azad etdi və tarixi ədaləti bərpa etdi. Bununla belə, dövlətimizin qarşısında duran əsas məqsəd yalnız ərazi bütövlüyünün deyil, həm də tam suverenliyin təmin olunması idi.

2023-cü ildə həyata keçirilən antiterror tədbirləri nəticəsində Azərbaycanın dövlət suverenliyi ölkənin bütün ərazisində tam bərpa olundu. Bununla da uzun illər ərzində qarşıda duran ən mühüm milli hədəf gerçəkləşdi. Azərbaycan Konstitusiyasının hüquqi qüvvəsi bütün ölkə ərazisində təmin edildi, dövlət bayrağımız suverenliyimizin rəmzi olaraq bütün torpaqlarımızda dalğalanmağa başladı.

Bu tarixi nəticə yalnız hərbi və siyasi qələbə deyil, eyni zamanda Heydər Əliyev ideyalarının və dövlətçilik strategiyasının təntənəsidir. Çünki Ulu Öndərin yaratdığı möhkəm siyasi təməl, formalaşdırdığı dövlətçilik məktəbi və müəyyən etdiyi inkişaf kursu olmasaydı, bu böyük hədəflərə çatmaq mümkün olmazdı. Bu gün Qarabağda və Şərqi Zəngəzurda həyata keçirilən genişmiqyaslı quruculuq işləri, keçmiş məcburi köçkünlərin doğma yurdlarına qayıdışı və bölgənin yenidən dirçəldilməsi həmin tarixi siyasətin davamıdır.

Prezident İlham Əliyev dəfələrlə vurğulayıb ki, Azərbaycan xalqı Ulu Öndərin vəsiyyətini yerinə yetirib. Həqiqətən də, bu gün ölkəmizin əldə etdiyi nəticələrə nəzər saldıqda görürük ki, Heydər Əliyevin ən böyük arzusu artıq reallıqdır. Azərbaycan yalnız müstəqil dövlət deyil, eyni zamanda öz ərazi bütövlüyünü və suverenliyini tam təmin etmiş qüdrətli dövlətdir.

Tarix bəzi şəxsiyyətlərə xalqların taleyini dəyişmək missiyası verir. Heydər Əliyev də belə nadir liderlərdən idi. Onun ömrünü həsr etdiyi dövlətçilik idealları bu gün öz ən yüksək zirvəsinə çatmışdır. Güclü iqtisadiyyata, müasir orduya, yüksək beynəlxalq nüfuza və tam suverenliyə malik Azərbaycan Ulu Öndərin həyat amalının, siyasi irsinin və böyük arzularının ən möhtəşəm təcəssümüdür.

Zülfəli Muradov,

YAP Neftçala rayon təşkilatı ərazi partiya təşkilatının sədri

Neftçala Rayon Telekommunikasiya Qovşağının rəisi