Azərbaycan xalqı öz qədim tarixi boyunca çoxsaylı sınaqlardan keçmiş, böyük məhrumiyyətlər yaşamış, lakin heç vaxt haqqını tələb etməkdən, mübarizə aparmaqdan imtina etməmişdir. Ölkəmizin 20 faiz torpaqlarının Ermənistan tərəfindən işğal olunması Azərbaycan tarixinin ən faciəli və ağrılı səhifələrindən biri olsa da, xalqımız və dövlətimiz bu işğalla heç vaxt barışmamış, əksinə, hər zaman torpaqlarını azad etmək əzmini nümayiş etdirmişdir.1988-ci ildən başlayaraq Ermənistanın Azərbaycana qarşı ərazi iddiaları nəticəsində, 1992-1994-cü illərdə baş vermiş Birinci Qarabağ müharibəsi zamanı Dağlıq Qarabağ və ətraf 7 rayon işğal olundu. Minlərlə insan şəhid oldu, yüz minlərlə insan qaçqın və məcburi köçkün vəziyyətinə düşdü. Şəhərlər, kəndlər, mədəniyyət abidələri, məscidlər dağıdıldı, torpaqlar talan edildi.

Lakin bu faciələrə baxmayaraq, Azərbaycan xalqı öz torpaqlarını unutmadı, onları azad etmək üçün milli birlik və iradəsini daim qorudu. Azərbaycanın dövlət rəhbərliyi beynəlxalq tribunalarda, siyasi platformalarda işğal faktını davamlı şəkildə gündəmdə saxladı, beynəlxalq təşkilatların müvafiq qətnamələri qəbul edildi və diplomatik mübarizə aparıldı.

44 günlük Vətən müharibəsi və Qələbə.Azərbaycan xalqının və dövlətinin bu möhkəm iradəsi və dözümü 2020-ci ilin payızında öz bəhrəsini verdi. 27 sentyabrda başlayan və 44 gün davam edən Vətən müharibəsi nəticəsində Azərbaycan Ordusu işğal altındakı torpaqlarımızın böyük hissəsini azad etdi. Şuşa başda olmaqla Qarabağın ürəyi geri qaytarıldı və Ermənistan kapitulyasiya aktına imza atmağa məcbur oldu.Bu Qələbə göstərdi ki, Azərbaycan xalqı və dövləti heç vaxt işğalla barışmayıb və heç vaxt barışmayacaq. Dövlətimizin güclənməsi, xalqımızın birliyi və vətənpərvərliyi sayəsində 30 ilə yaxın çəkən ədalətsizlik aradan qaldırıldı.

Azərbaycan xalqı üçün Vətən müqəddəsdir. Bu torpaq üçün canlarını fəda edən şəhidlərimizin xatirəsi xalqımızın və dövlətimizin ürəyində əbədi yaşayacaq. Qarabağda və digər azad edilmiş ərazilərdə aparılan quruculuq işləri, insanların öz doğma yurdlarına qayıtması sübut edir ki, biz bu torpaqların həqiqi sahibləriyik və heç vaxt başqa cür olmayacaq.Azərbaycan xalqı və dövləti həmişə öz torpaqlarını qoruyacaq, heç vaxt işğalla barışmayacaq və ədaləti müdafiə etməyə davam edəcəkdir.

Arzu Abdullayeva,

Hacıqabul rayon Mərkəzi Kitabxanasının əməkdaşı, YAP fəalı.